अफ्रिका कपः अल्जेरिया दोस्रो पटक च्याम्पियन

एजेन्सी । बागदाद बोउनेदाको निर्णायक गोलको मद्दतमा अल्जेरिया नयाँ अफ्रिकी कप च्याम्पियन बनेको छ। इजिप्टको कायरो रंगशालामा भएको अफ्रिकी कप अफ नेसन्सको फाइनलमा अल्जेरियाले सेनेगललाई १–० ले पराजित गर्दै दोस्रो पटक उपाधि आफ्नो पक्षमा पार्यो।

खेलको दोस्रो मिनेटमा बोउनेदाको प्रहार सेनेगेलका सालिफ सानेलाई लाग्दै गोल भएको थियो। खेल अधिकांश समय सेनेगलको पक्षमा रहे पनि गोल गर्न नसक्दा पहिलो पटक उपाधि जित्ने अवसरमा बञ्चित रह्यो। खेल अवधिभर अल्जेरियाले पोस्टमा गरेको एक मात्र आक्रमण नै उपाधि जित्न पर्याप्त रह्यो। पहिलो उपाधि जित्ने दाउमा रहेको सेनेगलले दोस्रो हाफमा रेफ्रीबाट पेनाल्टी पाएको थियो।

तर, रेफ्रीले पछि भिडियो असिस्टेन्ट रेफ्रीको सहायता लिँदै निर्णय परिवर्तन गरे। अल्जेरियाले सन् १९९० पछि पहिलो पटक उपाधि जितेको हो भने सेनेगल २००२ मा फाइनल पुगे पनि क्यामरुनसँग पराजित बन्दै उपाधि जित्न सकेन। फाइनल प्रवेशका लागि अल्जेरियाले नाइजेरिया र सेनेगलले टयुनेसियालाई हराएको थियो।

कमेन्ट गर्नुहोस्

error: Content is protected !!