सडक बनेको ६ वर्षपछि बल्ल मनाङमा बस गुड्यो, सर्वसाधारण हर्षित

लमजुङ, चैत १३ । जीप, मोटरसाइकल गुड्दै आएको हिमाली जिल्ला मनाङको सडकमा बस गुड्न थालेका छन् । मनाङ सडक सञ्जालमा जोडिएको ६ बर्षपछि बस सञ्चालन हुन थालेको हो ।

नेपाली सेनाले निर्माण गरेको उक्त सडक २०६९ मा सकिएर तत्कालीन सडक विभागलाई हस्तान्तरण गरिएको थियो । यसअघि जीप, मोटरसाइकल गुडाउँदै आएकोमा हाल उक्त सडकमा मिनिबस सञ्चालन गरिएको छ । केहि बर्षयता मालवाहक साना ट्रक सञ्चालन भइरहेको सो सडकमा मिनिबस समेत गुड्न थालेपछि स्थानीय छक्क पर्न थालेका छन् ।

आइतबार पहिलो पटक मिनि बस मनाङ आएको चामे गाउँपालिका अध्यक्ष लोकेन्द्रबहादुर घलेले बताए। ‘यो बाटोमा मोटरसाइकल र जीप दैनिक गुड्छ । बस आएको थिएन । भीर र अप्ठ्यारो बाटोमा समेत बस आयो । पहिलो पटक बस आउँदा सबै दङ्ग परे । मलाई समेत अचम्म लाग्यो ।’ उनले भने । अध्यक्ष घलेका अनुसार तल्लो क्षेत्रमा विभिन्न जलविद्युत आयोजनाले बाटोको स्तरउन्नति गरिरहेकाले पनि बस आउन सजिलो भएको हो । चामेभन्दा माथि माथिल्लो मनाङसम्म मिनिबस जान सक्ने उनले बताए ।

पहिलो पटक चामेमा बस पुर्याएका बस चालक प्रेम भण्डारीले बाहुनडाँडाबाट चामेसम्म बस लगेको बताए । उनका अनुसार विदेशी पर्यटक १० जना र अन्य नेपाली गरी २८ जनालाई चामेसम्म पुर्याएको हो । बस चालक भण्डारीका अनुसार बस बाहुनडाँडाबाट ६ घण्टामा चामे पुगेको थियो ।

ग.१.ख ४६०२ नम्बरको २६ सीटे सो मिनि बस आइतबार नै चामे पुगेर फर्किएको हो । बस चालक प्रेम भण्डारीका अनुसार २७ हजार रुपियाँमा रिजर्भ गरेर लगिएको सो मिनि बस लगिएको हो । ‘मनाङमा गाडी पुर्याउँदा खासै समस्या भएन । अप्ठ्यारो पनि लागेन’ उनले भने, ‘बेंसीसहरबाट मनाङ अब मिनिबस गुडाउन सकिन्छ ।’

मनाङका प्रहरी नायव उपरीक्षक खड्कबहादुर खत्रीका अनुसार चामेसम्म सहजै बस आएकाले त्यस भन्दा माथि पनि लान सकिने बताए । उनले भने– ‘चामेबाट माथि पनि जान सकिन्छ । एक–दुई ठाउँको भीरमा अलि अप्ठ्यारो भएपनि कम उचाईको सानो खाले बस लान सकिन्छ ।’ चामे माथिका सडकमा साना ट्रकहरु सामान बोकेर हिँड्ने गरेकाले मिनि बस जान सक्ने उनले बताए ।

मनाङको सडकको स्तरउन्नति गरिएपछि मिनि बस पुगेको हो । बेसीशहरबाट मनाङ सदरमुकाम चामेसम्मको ६५ किलोमिटर छ, सडकको ठाउँठाउँमा भीर छ, भीरमा बाटो केहि फराकिलो रहेको चालक बताउँछन् । मनाङमा नियमित बस सञ्चालन हुन सके सामान ढुवानी र आवातजावतमा सहज हुने स्थानीय बताउँछन् । यो बाटोमा मिनि बस नियमितरूपमा सञ्चालन भएमा पर्यटकलाई समेत सहज हुने उनीहरुको भनाई छ । गोरखापत्रबाट

कमेन्ट गर्नुहोस्