आइपीएलमा सन्दीपको प्रशंसा, मुम्बईविरुद्ध पाउलान् आज मौका?

काठमाडौं, चैत १० । इन्डियन प्रिमियर लिग (आइपीएल) को १२औं संस्करण अन्तर्गत तेस्रो खेलमा आज साँझ नेपाली लेग स्पिनर सन्दीप लामिछाने आवद्ध दिल्ली क्यापिटल्स र मुम्बई इन्डियन्स भिड्दै छन् । यी दुई टिमबीचको खेल नेपाली समयअनुसार साँझ ८ः१५ बजेदेखि मुम्बईमा हुँदैछ ।

यसैबीच, नेपाली क्रिकेटर लामिछानेको प्रदर्शनबारे क्रिकेट विश्लेषक एवं क्रिकेटरहरुले प्रशंसा गरेका छन् । पूर्व अष्ट्रेलियन क्रिकेटर एवं चर्चित क्रिकेट विश्लेषक ब्राड हजले लामिछानेको मुक्तकण्ठले तारिफसमेत गरेका छन् । सन्दीपलाई हजले बहुप्रतिभावान खेलाडी भनेका छन् ।

क्रिकेट खेलको प्रख्यात वेभ साइट, इएसपिएन क्रिकिन्फोसँग कुराकानी गदै विश्लेषक हजले यसपटक दिल्लीका लागि सन्दीपले राम्रो नतिजा निकाल्न महत्वपूर्ण योगदान दिन सक्ने बताए ।

‘सन्दीप दिल्लीका एक्स–फ्याक्टर खेलाडी हुन् । उनीसँग अहिले धेरै खेलको अनुभव छ । आवश्यक परेको बेला विकेट लिने सन्दीपको क्षमता वेजोडको छ । एक स्पिनरका रुपमा सन्दीपको टर्न र बाउन्स गर्ने क्षमता उत्कृष्ट छ । उनको गुग्ली सटिक छ । अष्ट्रेलियाको बिग बासमा पनि सन्दीपको बलिङ उच्च कोटीको थियो,’ हजले भनेका छन् ।

हजले सन्दीप आइतबार दिल्लीको पहिलो ११ मा पर्ने दावी पनि गरेका छन् । हजले जस्तै भारतका पूर्व क्रिकेटर अजित अग्रखरले पनि सन्दीपको उत्कृष्ट खेलाडी भएकोले उनी पहिलो रोजाईमा पर्ने बताएका छन् । यस्तै, सन्दीपकै टिमका स्टार खेलाडी शिखर धवनले पनि सन्दीपको प्रशंसा गरेका छन् । शिखरले सन्दीपलाई युवा खेलाडीका लागि उनी प्रेरणाको स्रोत बन्न सक्ने भन्दै प्रशंसा गरेका छन् । अघिल्लो सिजनमा पनि दिल्लीका लागि अन्तिम तीन खेल खेलेर पाँच विकेट लिँदै सनसनी मच्चाएका सन्दीपले एकबर्षको दौरानमा विश्वका सबै लिग खेलिसकेका छन् । सन्दीपको ६.८० को उत्कृष्ट इकोनोमी सहित ४५ विकेट लिई सकेका छन् ।

यही पृष्ठभूमि र अनुभवको आधारमा यस सिजन दिल्लीले सन्दीपलाई मौका दिने धेरैको अनुमान छ । तर, दिल्ली क्यापिटल्समा अहिले अमित मिश्रा, राहुल तेवाटिया र अक्षर पटेल जस्ता अनुभवी स्पिनर पनि छन् । त्यसैले आइतबार सन्दीपले मौका पाउने वा नपाउने विषयलाई निकै चासोका रुपमा हेरिएको छ । आइपीएलमा अन्तिम ११ मा ४ विदेशी खेलाडी राख्ने नियम छ ।

कमेन्ट गर्नुहोस्

error: Content is protected !!