विद्याले मन्त्री अधिकारीलाई शुभयात्रा नभनेको त्यो दिन

चिप्लेढुङ्गा, फागुन २७ । ‘म जहाँ जाँदा पनि उहाँलाई शुभयात्रा भनेर बिदाइ गर्थे’, त्यही दिन मात्र मलाई शुभयात्रा भन्ने अवसर मिलेन, आज पनि त्यही पश्चात्ताप छ।’ तत्कालीन मन्त्री तथा नेकपाका नेता रवीन्द्रप्रसाद अधिकारीकी पत्नी विद्या भट्टराई अधिकारीलाई सम्झँदै छन्। ‘जत्ति हतार नै भए पनि जाने बेला जानकारी गराएर जानुहुन्थ्यो। मैले त्यही दिन शुभयात्रा भन्न पाइन। घटना त्यही दिन भयो, आज पनि मनमा त्यही कुरा आइरहन्छ’, उनलाई आत्मग्लानि छ। परिस्थितिलाई स्वीकार्नुको विकल्प नभएको बताउँदै आफू आघातमा परेको स्पष्ट गरिन।

राजनीतिक व्यक्तित्व भएकाले आफूलाई उनले समय नदिएको भन्ने गुनासो नरहेको र दुवै जना काममा भएकाले आफूहरुबीच एक प्रकारको उच्च समझदारी भएको बताउँदै कुनै बेलाकी विद्यार्थी नेत्री विद्याले भनिन्, ‘एक अर्काप्रतिको सम्मान र माया थियो। श्रीमान र श्रीमती भन्दै जुनसुकै बेला पनि हामी कुरा शेयर गर्दैनथ्यौँ। एक अर्काका अवस्था र अनुहारलाई पढेर आफ्नो कुरा राख्ने गथ्यौं। अन्तिम समयसम्म मलाई तपाईँ नै भनेर सम्बोधन गर्नुभयो।

मन्त्री भएपछि मात्रै उहाँसँग अलि बढी सँगै बस्ने अवसर मिलेको थियो।’ जीवनमा पहिलो पल्ट आफूलाई एकदम नराम्रो लागेको वाइड बडी जहाज काण्ड भन्दै विद्याले धेरैपछि आफूले सो विषयमा सोध्दा भनेका थिए, ‘सिष्टमबाट अन्तिम किस्ता गयो, नगएको भए जहाज आउँदैनथ्यो। मेरो कुनै संलग्नता छैन विद्या। चिन्ता लिनुपर्दैन। यो सबै वायुसेवा निगमलाई डुबाउने खेल हो।

निजी कम्पनीहरुबाट यो खेल शुरु भएको छ। मलाई सिध्याउने खेल हो तर म जिरोबाट पनि आउन सक्छु। यो सबै राजनीतिका लागि बनाइएको एजेण्डा हो। म गलत छैन।’ आफू जुन कुरामा खुशी हुन सकिन्छ त्यसमा रमाउनुपर्छ भन्ने मान्यता राख्ने अधिकारीले आफूलाई कुनै पनि कुरामा दवाव नदिएको र आफू अब्बल हुनुपर्छ भन्ने मान्यता राखेको विद्याले बताइन। ‘राजनीतिमा महिलाको आगमन र अस्तित्वलाई अझै पनि सहज स्वीकारेको पाइँदैन। अहिले म पीडामा नै छु, राजनीतिमा जाने नजाने बारे सोच बनाएकी छैन तर उहाँको सपना पूरा गर्ने दायित्वबाट म अलग हुन मिल्दैन।’

त्यो कविता र स्वर मेरो होइन

सामाजिक सञ्जालभरि घटना भएको केही घण्टाभित्रै अधिकारीकी श्रीमती विद्याको मन रुवाउने कविता भनेर सार्वजनिक गरिएको भिडियोप्रति भट्टराईले आपत्ति जनाएकी छन्। ‘घटना भएको केही घण्टामा नै मेरो नामको कविता र स्वर भन्दै युट्युब र सामाजिक सञ्जालमा राखिएको रहेछ। त्यति छिटो त्यो अवस्थामा म कसरी कविता लेखेर वाचन गर्न सक्छु ? धेरैले मैले नै हो भनेर सोच्नुभएको रहेछ। भेट्न आउनेले पनि सोधे। मप्रति सहानुभूति राखेर पीडाको व्यापार जसले गर्नुभयो, त्यो राम्रो भएन। यसले मलाई झनै दुःखी बनाएको छ। यसले भ्रम छर्ने काम भएको छ। को हो त्यो पत्ता लगाउने प्रयास भैरहेको छ’, उनले भनिन्। रासस

कमेन्ट गर्नुहोस्

error: Content is protected !!