तामाङ समाज युएईले सोनाम ल्होछार मनाउने

अनिस तामाङ।

युएई,पुष ३०।तामाङहरुको सामाजिक संस्था तामाङ समाज युएईले यहीँ आउदो फेब्रअरी ८ तारिख शुक्रबार सोनाम ल्होछार मनाउने भएको छ।

तामाङहरुको सांस्कृतिक पक्षहरुको जगेर्ना गर्ने उदेश्यले ” तामाङ समाज युएईको शान, तामाङ सांस्कृतिक तामाङ पहिचान” भन्ने मुल नाराको साथ सोनाम ल्होछार २८५५ फाग ल्होको उपलक्ष्यमा सेलो विशेष ल्होछार साँझ-२०१९ गर्ने भएको हो।

राज्य सत्ताबाट सधैं पछाडि छाँयामा पारिएका तामाङहरुको आफ्नो सामाजिक, सांस्कृतिक एवं धार्मिक पक्षहरुलाई संरक्षण र प्रबर्द्धन गर्ने उदेश्यले सन् २००५ सालमा छत्र लामाको अध्यक्षतामा स्थापना भएको तामाङ समाज युएईले स्थापनाकाल देखि नै विभिन्न तबरले आफ्नो समुदायको लागि ठुलो योगदान दिदै आइरहेका छन ।

तामाङहरुको राष्ट्रिय पर्व सोनाम ल्होछार जस्ता चाडहरुमा सांस्कृतिक कार्यक्रम गर्ने, शिक्षाको कारणले पछाडि परेका समुदायलाई माथि उठाउने उदेश्यले प्रत्येक वर्ष शिक्षाको लागि सहयोगार्थ एस.एम.एस धमाका(सपोर्ट माइ स्कुल) च्यारिटि शो मार्फत उठेका रकम तामाङ बहुलियता भएको दुर्गम गाउँ बस्तीका विद्यालयहरुमा आर्थिक सहयोग गर्ने जस्ता विभिन्न सामाजिक कामहरु गर्दै आएका छन ।

गत वर्षको एसएमएस धमाका-२०१८ कार्यक्रममा उठेको रकम नुवाकोट जिल्ला मेघाङ-४ स्थित श्री भुमेदेवी माविलाई शैक्षिक सहयोग गरेका छन भने मृगौला पीडित अमीत तामाङलाई उपचारका लागि आर्थिक सहयोग गरेको तामाङ समाज युएईका अध्यक्ष महेश मोक्तानले जानकारी दिएका छन् ।

त्यस्तै तामाङहरुको मौलिक धर्म संस्कृति नै समुदायको पहिचान भएकाले तामाङ समाज युएईले प्रत्येक वर्ष ल्होछार कार्यक्रम आयोजना गरि रोजगारीको शिलशिलामा सात समुन्द्र पारी युएईमा रहेका मेची देखि महाकाली सम्मका तामाङ समुदाय र ल्होछार प्रेमीहरुलाई आफ्नो संस्कृतिको झ-झल्को दिदै आइरहेका छन ।

युएईको दुबई स्थित कार्ल्टन टावरमा दिउँसो ठिक ०२:०० बजे सुरु हुने उक्त कार्यक्रमका लागि नेपाल बाट नेपाल तामाङ कलाकार संघका अध्यक्ष एवं चर्चित सेलो गायक सन्जिव वाइबा अतिथि कलाकारको रुपमा उक्त कार्यक्रममा सहभागी रहनेछ भने साथमा प्रवासी कलाकारहरुको समेत जोडदार प्रस्तुति रहने कार्यक्रम संयोजक भिम दोङ तामाङले जानकारी दिएका छन ।

कमेन्ट गर्नुहोस्