पूर्वप्रधानमन्त्री शरिफकी श्रीमतीको लन्डनमा निधन, पति र छोरी जेलमा

लण्डन, भदौ २६ । पाकिस्तानका पूर्वप्रधानमन्त्री नवाज शरिफकी श्रीमती कुल्सूम नवाजको बेलायतमा निधन भएको छ। उनी ६८ वर्षकी थिइन्।

तीन पटक प्रथम महिला रहिसकेकी कुल्सूमलाई सन् २०१७ मा क्यान्सर भएको पत्ता लागेको थियो। गत जुन १४ मा उनलाई हृदयाघात पनि भएको थियो। नवाज शरिफ र छोरी मरियम अहिले पाकिस्तानको जेलमा छन्।

कुल्सूमलाई लन्डनमै छोडेर गत जुलाईमा निर्वाचनअघि छोरीसहित शरिफ स्वदेश फर्किएका थिए। स्वदेश फर्किए लगत्तै उनलाई पक्राउ गरी जेलमा राखिएको छ ।

त्यसअघि नै नवाज शरिफ र मरियम शरिफलाई उनीहरूको अनुपस्थितिमा भ्रष्टाचारसम्बन्धी एउटा मुद्दामा दोषी ठहर गरी जेल सजाय सुनाइएको थियो। उनीलाई १० वर्ष जेल र एक करोड डलर जरिवानाको फैसला सुनाइएको थियो ।

भ्रष्टाचारको मुद्दामा दोषी भएको भन्दै पाकिस्तानको अदालतले नवाज शरिफलाई राजनीतिमा संलग्न हुन प्रतिबन्ध लगाएको छ। गत वर्ष उनीलाई भ्रष्टाचारको आरोपमा प्रधानमन्त्रीबाट पदमुक्त गरिएको थियो । साथै उनलाई सांसद पदबाट पनि मुक्त गरिएको थियो । उक्त स्थानमा भएको उपनिर्वाचनबाट कुल्सूम सांसद निर्वाचित भएकी थिइन्।

तर विदेशमा क्यान्सरको उपचार चलिरहेका कारण उनले शपथ भने लिन सकिनन्।

सन् १९७१ मा कुल्सूमको नवाज शरिफसँग बिहे भएको थियो। नवाज शरिफ सन् १९९० देखि १९९३, १९९७ देखि १९९९ र २०१३ देखि २०१७ गरी तीन पटक प्रधानमन्त्री बनेका थिए।

गत वर्ष अदालतले उनलाई पदमुक्त गरिदिँदा शरिफसँग आफ्नो आवधिक कार्यकाल पूरा गर्ने पहिलो प्रधानमन्त्री बन्न एक वर्ष बाँकी थियो।

सन् १९९९ मा रक्तहीन सत्तापलट गरेर सेनाप्रमुख परवेज मुशर्रफले शरिफबाट सत्ता आफ्नो हातमा लिएका थिए।

कमेन्ट गर्नुहोस्

error: Content is protected !!