नेपाल बङ्गलादेशसँग भिड्दै

काठमाडौं, भदौ २३ । बङ्गलादेशको ढाकामा जारी साफ च्याम्पियनसीप फुटबलअन्तर्गत अहिले केही बेरमा नेपाल बङ्गलादेशसँग भिड्दै छ । खेल बंगबन्धु राष्ट्रिय रगंशालामा स्थानीय समय अनुसार पौने ७ बजेदेखि शुरु हुने छ ।

नेपालले आज आफ्ना दुई वटा खेलाडी परिवर्तन गरेको छ । नेपालले भुटानविरुद्ध खेलेका मध्ये दुई खेलाडी परिवर्तन गरेको हो । बङ्गलादेशविरुद्ध पनि गोलकिपर किरण चेम्जोङले कप्तानी सम्हाल्नेछन् । नेपालले आज अन्जन विष्टको स्थानमा भरत खवास र विशाल राईको स्थानमा निराजन खड्कालाई टोलीमा राखेको नेपाली प्रशिक्षक बालगोपाल महर्जनले जानकारी दिए । सेमिफाइनलमा स्थान बनाउन नेपाललाई आजको खेल जित्नै पर्ने दबाब छ ।

मुख्य प्रशिक्षक महर्जनले आजको खेलमा नेपाली टोलीलाई चार, चार, दुईको ढाँचामा खेलाडी मैदान उतार्ने बताएका छन् । नेपाली टोलीमा गोलकिपर किरण चेम्जोङ, डिफेन्डरमा सुमन अर्याल, अनन्त तामाङ, आदित्य चौधरी, दिनेश राजवंशी, मिडफिल्डरमा रोहित चन्द, निराजन खड्का, सुजल श्रेष्ठ, सुनिल बल र फरवार्डमा विमल घर्तीमगर तथा भरत खवास छन् ।

बङ्गलादेशविरुद्ध विगतको नतिजा हेर्ने हो भने नेपालको पक्षमा छैन । साफ च्याम्पियनसिपमा बङ्गलादेशविरुद्ध छ पटक प्रतिष्पर्धा गरिसकेको नेपालले चारमा पराजित र दुईमा जित हासिल गरेको छ ।

शनिबार भएको पाकिस्तान र भुटानबीचमो पहिलो खेलमा पाकिस्तान ३–० ले विजयी भएको छ । अब नेपालले अघिल्लो चरणको प्रवेशका लागि जितले मात्रै अर्थ राख्दैन । फराकिलो जितको आवश्यकता छ ।

कमेन्ट गर्नुहोस्

error: Content is protected !!