समृद्ध प्रदेशको रुपमा विकास गर्नेः मुख्यमन्त्री पौडेल

काठमाडौं, भदौ २ । मुख्यमन्त्री डोरमणि पौडेलले जनतालाई प्रत्यक्ष अनुभूती हुने गरी प्रदेश नं ३ लाई समृद्ध प्रदेशका रुपमा विकास गर्ने बताएका छन् ।

मदन भण्डारी फाउण्डेशनको दोस्रो राष्ट्रिय सम्मेलनको शनिबार राजधानीमा उद्घाटन गर्दै उनले भने, “ वर्तमान सरकारले देशमा व्यापक परिवर्तन गरेरै छाड्ने छ, यो हाम्रो सङ्कल्प हो, यसलाई पूरा गर्न सबैको साथ र सहयोग आवश्यक छ ।”

मुख्यमन्त्री पौडेलले पच्चीस वर्षअघि जननेता मदन भण्डारीले स्थापना गरेको जगमा हामी अहिले उभिरहेका छौँ भन्दै मदन भण्डारीको सिद्धान्तलाई जीवन्त बनाउन सकेमा मात्र उनीप्रति सच्चा श्रद्धाञ्जलि ठहरिने बताए ।

मदन भण्डारी फाउण्डेशनका केन्द्रीय सदस्य सीता पौडेलले नेपाल कम्युनिष्ट पार्टीभित्र बहुदलीय जनवादलाई आत्मसात् गर्दै आएका र जनताको बहुदलीय जनवादको नाम नै सुन्न नचाहने दुई फरक धार भएका नेकपा एमाले र माओवादीबीच एकता भएको प्रसङ्ग उल्लेख गर्दै वर्तमान सरकारले जनताको चाहना र अपेक्षा पूरा गर्ने बताइन ।

नेकपाका नेता डा राजन भट्टराई तथा देवराज घिमिरेले नेपालको कम्युनिष्ट आन्दोलनलाई मदन भण्डारीले प्रजातान्त्रिकीकरण गरेको धारणा व्यक्त गरे ।

मदन भण्डारी फाउण्डेशनका उपाध्यक्ष गुरु बरालको सभापतित्वमा कार्यक्रम सम्पन्न भएको थियो ।

कमेन्ट गर्नुहोस्

error: Content is protected !!