खानेपानी मन्त्रीको निर्देशनपछि बाढी प्रभावित भक्तपुरमा निशुल्क सफा पानी वितरण

भक्तपुर, खानेपानी मन्त्री बीना मगरले भक्तपुरका बाढी पीडित जनतालाई निशुल्क पानी वितरण गर्न मातहतका निकायलाई निर्देशन दिनु भएको छ ।

लगातारको वर्षाले भक्तपुरका अधिकांश क्षेत्र डुबानमा परेपछि सम्भावित महामारी र अन्य जोखिम नियन्त्रण गर्न खानेपानी मन्त्रीले काठमाडौं उपत्यका खानेपानी लिमिटेड र काठमाडौं उपत्यका खानेपानी व्यवस्थापन बोर्डलाई निर्देशन दिँदै बाढी प्रभावित क्षेत्रमा निशुल्क पानी वितरण गर्न निर्देशन दिनुभएको हो ।

खानेपानी मन्त्रीको सचिवालयका रमेश भट्टले दिएको जानकारी अनुसार, बाढी प्रभावित क्षेत्रका जनतालाई प्रत्यक्ष राहत पुर्याउन मन्त्री मगरले केयुकेएलले वितरण गर्दै आएको टं्यांकरको पानी स्थिति सहज नहुँदा सम्म प्रभावित क्षेत्रमा वितरण गर्न र सरसफाईका लागि उच्च सतर्कता अपनाउन निर्देशन दिनु भएको हो ।

मन्त्री मगरको निर्देशन लगत्तै काठमाडौं उपत्यका खानेपानी लिमिटेड (केयुकेएल)ले भक्तपुरमा बाढी प्रभावित जनतालाई ट्यांकरबाट निशुल्क खानेपानी वितरणको कार्य शुरु गरेको छ ।

सचिवालयले दिएको जानकारी अनुसार, निशुल्क खानेपानीसँगै खानेपानी मन्त्रालयको उच्चस्तरीय टोली खानेपानी प्रशोधनलगायतका अन्य सामग्री वितरण गर्न प्रभावित क्षेत्र पुगेको छ । मन्त्रालयका सहसचिवको नेतृत्वमा गएको टोलीले बाढीका कारण सम्भावित स्वास्थ्य जोखिम नियन्त्रण गर्न खानेपानी प्रशोधनका लागि प्रयोग हुने क्लोरिनलगायतका सामग्री बोकेर प्रभावित क्षेत्र पुगेको हो ।

बाढीको प्रकोप जारी रहँदासम्म निरन्तर जनताको सेवामा खटिन निर्देशन अनुसार टोलीले प्रभावित जनतालाई निशुल्क पानी वितरण र अन्य सामग्री वितरण गरिरहेको टोलीमा सहभागी कर्मचारीले जनाएका छन् ।

लगातारको वर्षाले भक्तपुरको राजमार्ग वरिपरिका क्षेत्र, चाँगुनारायणलगायतमा ठूलो असर पारेको छ । कतिपयका घर डुबानमा परेका छन् भने बाटो अवरुद्द भएका कारण स्थानीय वासिन्दाले ठूलो समस्या झेल्नु परेको छ । विगत दुई दिनयता नियमित झरीका कारण पानीको निकास नहुँदा अधिकांश स्थानीय वासिन्दाका घर डुबेका छन् भने खाद्यान्न लगायतका बस्तुको समस्या भएको छ ।

खानेपानीको समुचित व्यवस्था नहुँदा फोहोर पानीको सम्पर्कका कारण रोग र महामारी फैलिन सक्ने अवस्थालाई मध्य नजर गर्दै मन्त्री मगरले आज बिहान मातहतका सबै निकायलाई मन्त्रालयका तर्फबाट हुनसक्ने सहयोगमा कुनै कमी आउन नदिन निर्देशन दिएकी थिइन । सोही निर्देशनका आधारमा अवस्था नियन्त्रणमा नआउँदासम्म सबै क्षेत्रमा ट्यांकरबाट पानी वितरण र पियुस लगायतका सामग्री वितरण गर्न मन्त्रालय र मातहतको निकायका कर्मचारीहरु प्रभावित क्षेत्रमा पुगेका हुन ।

कमेन्ट गर्नुहोस्

error: Content is protected !!