भारतीय गाडीको ओभरलोड नियन्त्रण नहुँदा नेपाली व्यवसायीलाई मर्का

बुटवल, वैशाख १० । भारतीय मालवाहक सवारी साधनले बोक्ने ओभरलोड नियन्त्रणमा सरोकारवाला निकाय गम्भिर नहुदाँ नेपाली यातायात व्यवसायीको पेशा धरासायी बन्दै गएको छ । दैनिक जसो ओभरलोडमा आउने भारतीय मालवाहक सवारीलाई नियन्त्रण गर्नुको साटो प्रहरीले उल्टै उनीहरुलाई प्रोत्साहन गर्ने गरेका छन् ।

विशेष गरि ओभरलोड समस्या समाधानकालागि भौतिक पूर्वाधार तथा यातायात व्यबस्था मन्त्रालयले भारबहन नियमन सम्बन्धि कार्यबिधि २०७१ लागू गरेपनि सम्बन्धित सरकारी निकायबाट प्रभावकारी रुपमा कार्यान्वयन नहुँदा ओभरलोड समस्या समाधान हुन सकेको छैन । भौतिक पूर्वाधार तथा यातायात व्यबस्था मन्त्रालयले २०७१ भदौ १ गतेदेखि लागुहुने गरी मालवाहक सवारीको भारवहन नियमन सम्बन्धि कार्यबिधि लागू गरेको थियो ।

उक्त कार्यबिधि कार्यान्वयन गराउने सरकारी निकाय भन्सार कार्यालय, प्रहरी, यातायात व्यबस्था कार्यालय र जिल्ला प्रशासन कार्यालयले कार्यविधि कार्यान्वयनमा उदासिनता देखाउँदा भारवहन नियन्त्रणकालागि बनेको कार्यबिधि अलपत्र जस्तै भएको हो ।

भारबहन नियमन सम्बन्धि कार्यबिधि २०७१ मा ६ चक्के मालवाहक ट्रकले ९.६ टन, १० चक्केले १६.५ टन, १२ चक्केले २१ टन र १४ चक्केले २५ टन भन्दा बढी भार बहन गर्न नपाईने उल्लेख छ । तोकिएको भारबहन क्षमता भन्दा बढी बार बहन गरेमा मालवाहक सवारी साधनले कार्यबिधिले तोकअनुसारको जरिवाना तिरि ओभर लोडको सामान अनलोड गर्ने र उक्त सामानको आफैले जिम्मा लिनु पर्ने उल्लेख छ ।

त्यस्तै आयात भएको सामानको भार बहन क्षमता मिलान गरेर मात्रै ढुवानीकालागि सम्बन्धि भन्सार कार्यालयले ईजाजत दिनुपर्ने र तोकिएबमोजिम भन्दा बढी भारबहन गर्नुपर्ने सामाग्रिको हकमा सम्बन्धित यातायात व्यबस्था कार्यालयको स्वीकृतिमा मात्रै भन्सार कार्यालयले ढुवानी ईजाजत दिन पाउने कार्यविधिमा छ ।

तर ओभरलोड भएर आएका भारतीय मालवाहक सवारी साधनलाई भने यो व्यबस्थाले छुन नसकेको नेपाली मालवाहक यातायात व्यबसायीहरु बताउँछन् । लागू भएको कार्यविधि प्रभावकारी रुपमा कार्यान्वयन गर्नकालागि पटक पटक सम्बन्धित कार्यालयहरुमा आग्रह गरिपनि ती कार्यालयका अधिकारीहरुले वेवास्ता गरेको पश्चिमाञ्चल यातायात व्यबसायी समिति बुटवलका अध्यक्ष टिकाराम गौतमले बताए ।

ओभरलोड समस्या समाधान नहुदाँ नेपाली यातायात व्यवसायीको व्यवसाय धरापमा पदै गएको र ओभरलोडका कारण सडक क्षतविक्षत हुदै गएको अध्यक्ष गौतमले बताए ।

भारतीय गाडीको ओभरलोडका कारण नेपाली व्यबसायीहरु आफ्ना सवारी साधन थन्काएर बस्नुपर्ने स्थिती बिकास हुँदै गएको बताउँदै पश्चिमाञ्चल यातायात व्यबसायी समितिका पूर्व अध्यक्ष लोकराज पोखरेलले सरोकारवाला निकाय गम्भिर नहुदाँ समस्या विकराल बन्दै गएको गुनासो गरे ।

भारतबाट वेलहीया तथा कृष्णनगर नाका हुँदै दैनिक नेपाल भित्रिने मालवहाक सवारी साधनमा अत्यधिक ओभरलोड हुने यातायात व्यबसायीहरुले दाबी गरेका छन । ‘जतिपनि भारतीय गाडीहरु नेपाल प्रवेश गर्दछन् ति ट्रकहरुमा अत्याधिक भारवहन हुन्छ जसले गर्दा नेपालका सडकको क्षमताले ति लोड धान्न सक्दैनन र सडक क्षतविक्षत हुनुका साथै अधिक लोडका कारण पुल पुलेसाहरु समेत जोखिममा परेका छन् ।’

नेपालमा मात्रै ६२ हजार ट्रक रहेको र ती ट्रकमा प्रत्यक्ष रुपमा सवालाख श्रमिकले रोजगारी पाएपनि सरकारले नेपाली व्यबसायीलाई वेवास्ता गरी भारतीय व्यबसायीलाई काखि च्यापेको गुनासो व्यवसायीको रहेको छ । ओभरलोडको समस्या ट्रक व्यवसायीका मात्र नभई सार्वजनिक महत्वका बिषय भएकाले कानूनले निर्दिष्ट गरेका कुराहरु कानून को परिपालना गर्ने गराउने निकायले नगरी कानूनकै वर्खिलाप भएको समेत व्यवसायीले गुनासो गरेका छन् ।

कमेन्ट गर्नुहोस्

error: Content is protected !!