एकता दुवै पार्टीका साथीहरुले आत्मगौरब गर्ने गरी हुनुपर्छ : सापकोटा

काठमाडौं, वैशाख ६। नेकपा माओवादी केन्द्रका नेता एवं सांसद अग्निप्रसाद सापकोटाले एमाले–माओवादीबीचको एकता ढिलोमा जेठ १ गते ( मे दिवस) सम्म हुने बताएका छन् ।

बिहीबार रिपोर्टर्स क्लब नेपालमा आयोजित साक्षात्कारमा बोल्दै नेता सापकोटाले भने, ‘केही गृहकार्य गर्न बाँकी रहेकोले यो बैशाख ९ गते गर्ने भनिएको एकता टरेको छ, तर यो धेरै विलम्ब हुँदैन् । हामी चाँडै नै एकता घोषणा गर्छौं।’

बाहिर भनिए जस्तो पार्टी एकता हुनेमा कुनै द्धिविधा नरहेको उनको भनाई छ । उनले भने, ‘जनताको जनादेश भनेको नै दुई पार्टीबीच एकता होस् भन्ने नै हो, त्यसैले विकास र समृद्धि हाँसिल गर्नुपर्छ, जनताले यी दुई सशक्त कम्युनिष्ट पार्टीबाट ठूलो आशा र भरोसा गरेका छन्, हामी सोही अनुरुप नै अघि बढेका छौं।’

देश भ्रष्टाचारले आक्रान्त बनेको उल्लेख गर्दै नेता सापकोटाले देश र जनतालाई विकास र समृद्धि दिलाउनको लागि पनि दुईपार्टीबीचको एकता अनिवार्य भएको सुनाए । उनले दुवै पार्टीको ईतिहास गर्विलो र सशक्त भएकोले एकताको मोडालिटी केन्द्र, प्रदेशदेखि स्थानीय निकायसम्म समानताको आधारमा र सम्मानजनक रुपमा हुनुपर्ने स्पष्ट पारे । उनले भने, ‘एकता ठीक ढंगले हुनुपर्यो, दुवै पार्टीका साथीहरुलाई आत्मगौरव हुनुपर्छ।’

पार्टी एकता भनेको दुवै पार्टीका सकारात्मक कुराहरुलई संश्लेषण मात्रै नभएर रासयनिक प्रतिक्रिया अनुसार विचार, सिद्धान्त र संगठन नयाँ सुरुवात गर्नु भएको सापकोटाको भनाई थियो । दुवै अध्यक्षले आलोपाले बैठकको अध्यक्षता गर्ने पनि समझदारी बनेको उनले सुनाए । सापकोटाले भने,‘एउटा बैठकको अध्यक्षता एउटा अध्यक्षले गर्दा, अर्को बैठकको अध्यक्षता अर्को बैठकले गर्ने उच्च समझदारी कायम गर्ने कुरा भैरहेको छ, औचित्यपुष्टि हुनेगरि कार्यविभाजन हुन्छ।’

सापकोटाका अनुसार आजपनि अध्यक्षद्धय केपी शर्मा ओली र पुष्पकमल दाहाल प्रचण्डबीच गम्भीर छलफल भएको थियो । उनले भने,‘‘केही दिनभित्रै एकताको ‘ब्रेक–थ्रु’ हुन्छ।’’ त्यस्तै उनले एकीकृत पार्टीको चुनाव चिन्ह सुर्य राख्नेबारे पनि छलफल भैरहेकोले सुर्यभित्र हँसिया हथौडा राख्दा सुनमा सुगन्ध हुने बताए ।

कमेन्ट गर्नुहोस्

error: Content is protected !!