नापतौल विभाग ग्यास बिक्री केन्द्रको अनुगमनमा

नवलपरासी । गुणस्तर तथा नापतौल क्षेत्रीय कार्यालय बुटवलले पश्चिम नवलपरासीका ग्याँस बिक्री केन्द्रको अनुगमन गरेको छ ।

ग्यासका सिलिण्डरमा तौल कम भएको भन्दै जिल्ला प्रशासन कार्यालयमा उजुरी परेपछि गुणस्तर तथा नापतौल क्षेत्रीय कार्यालयले मंगलबार अनुगमन गरेको हो ।

कार्यालयका वरिष्ठ निरीक्षक योगेन्द्र पौडेलको नेतृत्वमा खटिएको टोलीले पश्चिम नवलपरासीको सुनवल, भूमही, बासा लगायतका स्थानमा रहेका बिक्री डिपोमा अनुगमन गरेको हो । अनुगमन टोलीले आरती, जानकी, बाबा, सिद्धार्थलगायत कम्पनीका ग्यासको तौल, प्रयोग मिति लगायतको अनुगमन गरेको थियो ।

सुनवलको लुम्बिनी हार्डवेयर एण्ड जनरल अर्डर सप्लायर्स, भूमहीको रोशनी एण्ड पुष्पा इन्टरप्राइजेज, राजु मल्टी ट्रेडर्स, प्रतिमा इन्टरप्राइजेज लगायतमा गरिएको अनुगमनका क्रममा नापतौलमा सामान्य मात्रामा कम (फरक) देखिएको कार्यालयका वरिष्ठ निरीक्षक पौडेलले बताउनुभयो ।

धेरैजसोसँग आफ्नै तौल यन्त्र नभएकाले तत्काल नापतौल कार्यालयबाट अनुमति लिएर तौल यन्त्र राख्न निर्देशन दिइएको उहाँले बताउनुभयो । ती पसलमा मूल्यसूची नभएको, कतिपयले दर्ता नगरी सञ्चालन गरेको र एउटा दर्ता गरेर अर्काे व्यवसाय सञ्चालन गरिरहेको भेटिएको छ । अनुगमनमा जिल्ला प्रशासन कार्यालयका बृहस्पति घिमिरे, घरेलु तथा साना उद्योग कार्यालयका अनिल चौधरी, जिल्ला प्रहरी कार्यालयका प्रहरी सहायक निरीक्षक प्रेम शर्मालगायतको सहभागिता रहेको थियो । रासस

कमेन्ट गर्नुहोस्

error: Content is protected !!