राष्ट्रपति भण्डारीबाट बुर्ज खलिफाको अवलोकन

सुरेन्द्रबहादुर नेपाली

दुबई, कार्तिक २९ । राष्ट्रपति विद्यादेवी भण्डारीले बुधबार दुबईस्थित बुर्ज खलिफाको भ्रमण गरे ।

राष्ट्रपति भण्डारी बुर्ज खलिफा पुग्नुहुँदा उहाँको स्वागतार्थ अरमानी होटेल एन्ड रिसोर्टका शिष्टाचार अधिकारीहरूको उपस्थिति थियो ।

उक्त अवसरमा राष्ट्रपति भण्डारीले भवनको १५२ औँ तलास्थित स्वागत कक्षमा राखिएको आगन्तुक पुस्तिकामा हस्ताक्षर गरेको थियो । राष्ट्रपति भण्डारीका साथ आपूर्तिमन्त्री जयन्त चन्द पनि रहेकाे थियाे ।

नेपालका लागि संयुक्त अरब इमिरेट्स (युएई)का राजदूत सइद हमदन अलनक्वी तथा युएईका लागि नेपालका कार्यवाहक राजदूत नेत्रबहादुर टण्डन पनि उक्त अवसरमा उपस्थित भएका थिए ।

अंग्रेजी भाषाको ‘खलिफा टावर’ को अरेबिक रूपान्तर नै ‘बुर्ज खलिफा’ हो । यसलाई उद्घाटन पूर्व ‘बुर्ज दुबई’को नामबाट पनि चिनिन्थ्यो । यो संयुक्त अरब इमिरेट्स (युएई) को निकै अग्लो भवन हो । यसमा १६४ तला रहेको छ ।

‘बुर्ज खलिफा’को कूल उचाइ ८२९.८ मिटर अर्थात दुई हजार २१७ फिट रहेको छ । सन् २००८ को अन्त्यतिर निर्माण सम्पन्न भएपछि यो संसारको सबैभन्दा अग्लो संरचनामा गनिन पुग्यो ।

‘बुर्ज खलिफा’को निर्माण २००४ मा आरम्भ भएको हो र सन् २००९ मा यसको बाहिरी भाग पूर्ण भएको हो । बाहिरी भागलाई कङ्क्रिटले बलियो बनाइएको छ ।

दुबई सरकारले तेलमा आधारित मुलुकको अर्थतन्त्रबाट मुक्ति पाउन र यस अमिरातलाई अन्तर्राष्ट्रिय स्तरमा चिनाउन यो संरचना निर्माण गर्ने योजना बनाएको हो ।

प्रारम्भमा यसको नाम ‘बुर्ज दुबई’ राखिएपनि पछि अबुधावीका शासक तथा संयुक्त अरब इमिरेट्सका राष्ट्रप्रमुख खलिफा बिन जायद अल नेह्यानको सम्मानमा यसको नाम परिवर्तन गरिएको हो । अबुधावी तथा युएईले यसको ऋण तिर्न दुबईलाई रकम उपलब्ध गराएको थियो । उचाइका अनेकौँ कीर्तिमान कायम गरेर यो भवन विश्वकै सबैभन्दा अग्लो टावर बन्न पुगेको छ ।

बुर्ज खलिफाको डिजाइन स्किडमोर, ओइङ्स तथा मेरिलका एड्रियान स्मिथले तयार गर्नुभएको हो । यसै कम्पनीले विल्स टावर तथा वन वल्र्ड ट्रेड सेन्टरको पनि डिजाइन बनाएको थियो । यस परियोजनाको वास्तु निरीक्षण गर्न हाइदर कन्सल्टिङलाई र सुपरीवेक्षण गर्न नोर ग्रुप कन्सल्ट्यान्टलाई जिम्मा दिइएको थियो ।

यसको डिजाइन ग्रेट मस्क अफ समाराको जस्तै इस्लामी वास्तुकलामा आधारित छ । ‘वाई’ आकारको तीन भाग भएको तलाको ज्यामितीय डिजाइनले आवासीय तथा होटेललाई स्थान दिएको छ । यसको मध्यभाग तथा अन्य शाखा भागले यस भवनको उचाइलाई भर दिएको छ ।

राष्ट्रपति भण्डारी संयुक्त अरब इमिरेट्स (युएई) को अबुधावीका युवराज तथा युएईको सशस्त्र बलका नायब सर्वोच्च कमान्डर शेख महम्मद बिन जाहेद अल नेह्यानको मैत्रीपूर्ण निमन्त्रणामा सोमबार साँझ अबुधावी पुग्नुभएको हो । नेपाल र युएईबीच कूटनीतिक सम्बन्ध स्थापनाको ४० औँ वार्षिकोत्सवको सन्दर्भमा राष्ट्रपतिबाट यो भ्रमण भइरहेको परराष्ट्र मन्त्रालयले जनाएको छ ।

राष्ट्रपति भण्डारीका साथ उहाँकी छोरी निशाकुसुम भण्डारी, राष्ट्रपतिका परराष्ट्र मामिला विज्ञ डा मदनकुमार भट्टराई, परराष्ट्र सचिव शंकरदास वैरागी, राष्ट्रपति कार्यालयका सचिव भूपेन्द्रप्रसाद पौडेल, राष्ट्रपतिका प्रमुख स्वकीय सचिव भेषराज अधिकारी र राष्ट्रपतिको कार्यालय एवं परराष्ट्र मन्त्रालयका उच्च अधिकारीका साथै सञ्चारमाध्यमका प्रतिनिधिहरु रहेकाे थियाे ।

राष्ट्रपति भण्डारी आजै बिहान अबुधावीबाट सडकमार्गबाटै दुबई आइपुगेको हो ।

कमेन्ट गर्नुहोस्

error: Content is protected !!