सेनाको नजरमा चार चुनौति, निर्वाचनमा ६० हजार सैनिक परिचालन

काठमाडौं, कात्तिक १७ । नेपाली सेनाको बिहीवार सम्पन्न पृतनापति समन्वय वैठकले आसन्न निर्वाचनका लागि चार चुनौतिबारे छलफल गरेको छ । साना हतियार, स्थानीय तहमा दुई गठबन्धनका कार्यकर्ताबीच हुनसक्ने झडप, नेत्रविक्रम चन्द नेतृत्वको पार्टी र तराई र पूर्वी पहाडका विखण्डनकारी समूहलाई सेनाले चुनौतिका रुपमा अथ्र्याएको हो । यी चुनौति ठूलो स्तरमा नरहेको तर कमजोर आँक्न पनि नहुने सैनिक अधिकारीहरुले विश्लेषण गरेका छन् ।

शुरुमा रक्षामन्त्री भीमसेनदास प्रधानले उद्घाटन गरेको र उनको विदाइपछि चलेको वैठकमा प्रधानसेनापति राजेन्द्र क्षत्री, बिहीवारै कार्यकाल सकिएका बलाधिकृत रथी बलदेवराज महत, बलाध्यक्षरथी पूर्णचन्द्र थापा, सैनिक गुप्तचर महानिर्देशनालयका प्रमुख जगदीशचन्द्र पोखरेल, सेनाको विशेष वाहिनीपति बाबुकृष्ण कार्की तथा उपत्यकाका प्रमुख कार्यालयका प्रमुखहरु सहभागी थिए ।

बैठकमा पूर्वी पृतनापति गौरब तण्डुल, मध्यपूर्वी पृतनापति ईश्वर हमाल, मध्यपृतनापति प्रभुराम शर्मा, उपत्यका पृतनापति पूर्ण सिलवाल, पश्चिम पृतनापति देवेन्द्र बहादुर मेधासी, मध्यपश्चिम पृतनापति राजेन्द्र कार्की, उत्तरपश्चिम पृतनापति कर्मेन्द्र लिम्बु र सुदुरपश्चिम पृतनापति झंकरबहादुर कडायत पनि सहभागी थिए ।

बैैठकमा सबै पृतनापतिले आ आफ्नो क्षेत्रको सुरक्षास्थिति, सुरक्षा योजना, विगतको समीक्षाका बारेमा प्रस्तुतीकरण गरेका थिए ।

पृतनापतिहरुले मंसिर १० र २१ को प्रादेशिक तथा प्रतिनिधिसभा निर्वाचन सुरक्षाका बारेमा आफ्ना क्षेत्रका बारेमा ब्रिफिङ गरेका थिए । ‘उपत्यकासहित आठ क्षेत्रको सुरक्षास्थितिका बारेमा छलफल भयो । त्यसक्रममा चुनाव विथोल्ने खालको सुरक्षा खतरा नभए पनि पृतनापतिहरुले चारवटा सुरक्षा चुनौति प्रस्तुत गर्नुभयो’ सेनाका एक बहालवाला उपरथीले नयाँ पत्रिकासँग भने, ‘मूलतः साना हतियार, स्थानीय तहमा हुनसक्ने झडप, बिप्लब समूहका गतिविधि र सिके राउत समूहका गतिविधिलाई शुक्ष्मरुपमा हेर्नुपर्ने ब्रिफिङ भयो ।’ ती अधिकारीका अनुसार पृतनापतिहरुले दलहरुको स्थानीय तहमा हुने झडपको अवस्थालाई पनि निगरानीमा राख्नुपर्नेमा जोड दिएका थिए ।

सेनाको नजरमा चार चुनौति
१. साना हतियार
२. स्थानीय तहमा वाम र लोकतान्त्रिक गठबन्धनबीच हुनसक्ने झडप
३. बिप्लब समूहको गतिविधि
४. तराईमा सिके राउत समूहका गतिविधि

सैनिक प्रबक्ता सहायकरथी नैनराज दाहालले ‘निर्वाचन सुरक्षा सम्बन्धी एक दिने छलफल कार्यक्रम’मा समग्र बिषयमा छलफल भएको र उत्पन्न सुरक्षा चुनौति सामना गर्न सेना तयार रहेको बताए । दाहालका अनुसार वैठकको शुरुमा रक्षामन्त्री भिमसेन दास प्रधानले सम्बोधन गरेका थिए । ‘प्रतिनिधिसभा तथा प्रदेशसभा सदस्य निर्वाचन स्वतन्त्र, निष्पक्ष, शान्तिपूर्ण, सुरक्षित र भयरहित वातावरणमा तोकिएको समयमै सम्पन्न गर्न सरकार कटिबद्ध छ’ रक्षामन्त्रीको भनाई थियो, ‘यसका लागि सेनालाई सहयोग गर्न सरकार प्रतिवद्ध छ ।’

पृतनापतिहरुको ब्रिफिङपछि प्रधानसेनापति क्षत्रीले अन्तरक्रियाबाट प्राप्त भएका महत्वपूर्ण सुझावका आधारमा अघि बढ्ने बताएका थिए । उनले निर्वाचन सुरक्षाका लागि जङ्गी अड्डाबाट सबै तहमा मार्ग निर्देशन पठाइएको उल्लेख गर्दै त्यही अनुसार परिचालित हुन निर्देशन दिए ।

यस्तो छ सेनाको सुरक्षा तयारी
सैनिक प्रबक्ता दाहालका अनुसार निर्वाचनमा ६० हजार २० जना सैनिक खटिएका छन् । सबै पृतनामा हेलिकोप्टर तैनाथ छन् । ‘मतपत्र छपाईको सुरक्षामा सेना छ । मतपत्र लैजान सडक तथा हवाई यातायातको साधन र सुरक्षा सेनाले गर्नेछ’ दाहालले भने, ‘मतदानका बेला हुनसक्ने जोखिमको विश्लेषण गर्दै हरके मतदान केन्द्रमा बम डिस्पोजल टोली खटाइएको छ । मतदाता र मतदान केन्द्रको सुरक्षाका लागि मोबाइल टिम खटाइएको छ ।’

सेना सुरक्षाको तेस्रो घेरामा खटिने
सेना विगतका निर्वाचनजस्तै सुरक्षाको तेस्रो घेरामा खटिने उनले बताए । पहिलो घेरामा प्रहरी, दोस्रो घेरामा सशस्त्र प्रहरी खटिएको छ । ‘प्रमुख जिल्ला अधिकारीको आग्रहका आधारमा तत्कालै खटिने अवस्थाको स्ट्याण्ड बाई फोर्स पनि तैनाथ गरिएको छ । यस्तो फोर्स जिल्ला, बाहिनी, पृतना र जंगी अड्डा गरी चार तहमा तैनाथ छ ’ सैनिक प्रबक्ता दाहालले भने ।

मतदानको दिन सेनाले हवाई गस्तीदेखि मोबाइल पेट्रोलिङ गर्नेछ । मतपेटिकालाई जिल्ला सदरमुकाममा ल्याउने र गणना नभएस्म्म सुरक्षा दिने कार्यमा पनि सेना खटिनेछ । दाहालका अनुसार दोस्रो चरणको निर्वाचन सम्पन्न भइसकेपछ विजय जुलुसमा उत्पन्न हुनसक्ने हुलदंगालाई पनि विश्लेषण गरेर सेनाले त्यहाँ पनि निगरानी राख्नेछ । उम्मेदवारको सुरक्षाका लागि पनि सेनाले सहयोग गर्नेछ । नयाँपत्रिकाबाट

कमेन्ट गर्नुहोस्

error: Content is protected !!