चितवनमा प्रचण्डका लागि मैदान खाली गर्न कांग्रेस–एमाले समर्थकहरूको जोड

गोकर्ण भट्ट
चितवन, असोज ९ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले आगामी केन्द्रीय व्यवस्थापिका संसदको निर्वाचनमा चितवनबाट उम्मेदवारी दिने घोषणा गरेपछि अन्य प्रतिष्पर्धी दलहरूबीच ठूलो तरंग सिर्जना भएको छ ।

प्रचण्डले चितवनको कुन क्षेत्रबाट निर्वाचन लड्ने भन्ने निर्णय नभए पनि उनको उम्मेदवारी घोषणाले जिल्लामा बलियो प्रभाव राख्ने कांग्रेस एमालेभित्र निर्वाचन रणनीतिको चर्चा शुरू भएको हो ।

चितवनको चर्चित माडी नगरपालिकाका मेयर ठाकुर ढकालका अनुसार कांग्रेस र एमालेका स्थानीय नेता तथा समर्थकहरूले प्रचण्डको उम्मेदवारीको स्वागत गरेका छन् । ‘पञ्चायतदेखि बहुदल र गणतन्त्रसम्म चितवनका जनताले धेरैलाई सांसदमा जिताए’, ढकालले भने, ‘तर चितवनको समग्र विकासमा निर्णायक भूमिका खेल्ने नेताको अभाव जहिले पनि खड्की रह्यो । प्रचण्डले चितवनबाट लड्ने घोषणा गरेपछि अरु दलका स्थानीय नेता र कार्यकर्ता समेत उत्साहित बनेका छन ।’

ढकालका अनुसार स्थानीय स्तरमा उम्मेदवारी घोषणाले ठूलो तरंग ल्याएको छ । दोश्रो संबिधान सभाको निर्वाचनमा अर्को क्षेत्रबाट जिते पनि सांसद र पछि प्रधानमन्त्री भएको बेला चितवनको बिकासमा प्रचण्डले उल्लेख्य भूमिका खेलेका कारण समेत उनीप्रतिको आकर्षण बढेको हो ।

चितवनको आर्थिक र सामाजिक विकासमा प्रचण्डले कैयन योजना भित्र्याएको बताउँदै ढकालले भने, ‘कांग्रेस एमालेले सोझै समर्थन गरेर या कमजोर उम्मेदवार उठाएर प्रचण्डलाई जिताउनु पर्ने कुरा अन्य दलका साथीहरूले गरे । झन माडीका जनता त उत्साहित नै भएका छन् । मेयर तपाई र प्रचण्ड यताबाट सांसद हुनु माडीको बिकासका लागि भाग्य खुलेको समेत भन्न थालेका छन ।’

संगठनात्मक प्रभावका हिसाबले ३ नम्बर निर्वाचन क्षेत्रमा माओवादीको बलियो प्रभाव छ । ‘हाम्रो जोड चाहीँ अध्यक्ष कमरेड ३ नम्बरबाट नै चुनाव लड्नु भन्ने हो’ ढकालले भने, ‘पार्टीको व्हिप मान्ने बाहेक अरु सबै प्रचण्डकै पक्षमा छन ।’

स्थानीय तहको निर्वाचनमा चितवनका ३ वटा निर्वाचन क्षेत्रमा ३ लाख १५ हजार ९३९ मतदाता रहेका थिए । यसअघि संविधानसभाको दोस्रो निर्वाचनमा जिल्लामा दुई लाख ७३ हजार ८०३ जना मतदाता थिए ।

२४ राजनीतिक दलले निर्वाचन कार्यालयमा नाम दर्ता गराए पनि मुख्य प्रतिष्पर्धा भने कांग्रेस, एमाले र माओवादीबीच नै हुने देखिन्छ । क्षेत्र नम्बर ३ मा राप्रपाका विक्रम पाण्डेको प्रभाव केही देखिए पनि प्रचण्डले त्यहाँबाट उम्मेदवारी घोषणा गरे राप्रपाको अधिकांश मत प्रचण्डले पाउने चर्चा माडीमा सुनिन्छ ।

त्यसो त दलहरूले उम्मेदवारी घोषणा नगरेका कारण निर्वाचनको माहौल नै भने बनिसकेको छैन । तर प्रचण्डको उम्मेदवारी घोषणाले अन्य दललाई उम्मेदवार छनोटमा आप्ठ्यारो भने पारेको ढकाल बताउँछन् । ‘कांग्रेसभित्र तालमेलको चर्चा सुरु भएको छ । एमालेभित्र कमज़ोर उम्मेदवार उठाएर प्रचण्डलाई जिताउन सहयोग गर्नु पर्छ भन्ने आवाज सुनिन थालेको छ’ ढक़ालले भने, ‘भोली अन्य पार्टीले उम्मेदवार उठाए पनि आम मनोबिज्ञान भने प्रचण्डलाई जिताऊँ भन्ने छ ।’

प्रचण्डको राष्ट्रिय व्यक्तित्वका कारण चितवनको विकासमा नाटकीय परिवर्तन आऊन सक्ने चर्चा चिया पसलहरूमा नी चल्न थालेको देखिन्छ ।

प्रचण्ड प्रधानमन्त्री बनेपछि चितवन जिल्लालाई मात्र केन्द्रित गरेर १ अर्ब ५२ करोड रुपियाँको बजेट घोषणा गरेका थिए । यो बजेट जिल्लाका बिभिन्न योजनाका लागि प्याकेज कार्यक्रमका लागि बिनियोजित गरिएको थियो ।

प्रधानमन्त्री हुँदा उनले प्याकेज कार्यक्रम अन्तर्गत चितवनमा औद्योगिक प्रदर्शनी केन्द्र स्थापनाका लागि १५ करोड, रंगशाला निर्माणका लागि ५० करोडको भरतपुर र पर्सामा चार–चार करोड रुपियाँको लगानीमा कभर्ड हल निर्माण, नारायणी नदी तटबन्धन गरी चक्रपथसहितको सडक निर्माण, भरतपुर उप महानगरपालिकाको जग्गामा सिटी हल, ल्यान्डफिल्ड साइट, भरतपुर महानगरपालिकाको–४ मा अन्डरग्राउन्ड पार्किङसहितको बहुतले सब्जीमन्डी निर्माण, जगतपुर हुँदै राप्ती पुल हुलाकी सडक कालोपत्रे गर्ने कार्यका लागि १ करोड ९९ लाख, चनौटे हुँदै गोलाघाट सडक कालोपत्रे गर्न १ करोड ५० लाख, मंगलपुर–शिवनगर सडकको स्तरोन्नतिका निम्ति १ करोड ८० लाख र शुक्रनगर–मेघौली सडक कालोपत्रे गर्न १ करोड ९९ लाख, गीतानगर बजारबाट शिवनगर बरको बोट हुँदै चनौलीसम्मको सडकका लागि १ करोड ५० लाख, माडी–खैरहनीपुर र शीतलपुरमा एकता स्तम्भ निर्माणलाई ५०÷५० लाख बजेट व्यवस्था गरेका थिए ।

‘९÷१० महिना सरकारको नेतृत्वमा रहदा दीर्घकालिन र अल्पकालिन विकासको नमूना प्रचण्डले देखाएका छन ।’ स्थानीय व्यवसायी बसन्त खरेलले भने, ‘यसले पनि सबै दलभित्र प्रचण्डको पक्षमा मत देखिएको हो । चितवनको विकास चाहने सबै वहाँको उम्मेदवारी घोषणाबाट खुशी र उत्साहित भएका छन् ।’

कमेन्ट गर्नुहोस्

error: Content is protected !!