अवरुद्ध कैलासखोला जलबिद्युत ४ वर्षपछी सञ्चालन

“राज्य कोषलाई करिब १२ करोड नोक्सानी”

होम साउद/

अछाम, असोज ९ । वर्षाका कारण पहिरोले नहर भत्किएको ४ वर्ष पछी अछामको कैलासखोला जलबिद्युत केन्द्र संचालनमा आएको छ । भत्किएको नहर र मुख्य मेसिनमा आएको खरावीलाई मर्मतसम्भार गरेपश्चात बिद्युत सञ्चालनमा आएको हो ।

२०७० भाद्र ६ गते वर्षाका कारण पहिरो जाँदा जलबिद्युत केन्द्रको करिब ६० मिटर नहर भत्किएको थियो । समयमै मर्मतका लागि पहल नहुदा ४ वर्षसम्म अवरुद्ध भएको बिद्युत सेवा पटक पटकको ताकेता र खबदारी पश्चात पुनः सञ्चालनमा आएको अछामका प्रमुख जिल्ला अधिकारी किशोर कुमार चौधरीले बताए ।

४ वर्ष अवरुद्ध हुदा करिब १२ करोड नोक्सानी

६०० किलोवाट क्षमताको जलबिद्युत केन्द्रले अहिले ४०० किलोवाट बिद्युत उत्पादन गर्ने गरेको छ । उत्पादीत बिद्युत सदरमुकाम मंगलसेन क्षेत्रमा पठाईरहेको नेपाल बिद्युत प्राधिकरण अछाम बितरण केन्द्रका प्रमुख रोशन कुमार ठाकुरले बताए । तत्काल दिउसोको समयमा मात्रै बिद्युत उत्पादन गर्ने गरेको उनको भनाई छ ।

बिद्युत सेवा अवरुद्ध हुन अघि आयोजनावाट अछाम सदरमुकाम मंगलसेन, मुख्य ब्यापारिक केन्द्र साँफेबगर सहित साविक १६ गाविसका २ हजार ८ सय ५५ उपभोक्ता लाभान्वित थिए । मासिक १२ लाख बढी बिद्युत महसुल संकलन हुने उक्त आयोजना अवरुद्ध हुदा नेपाल बिद्युत प्राधिकरणलाई करोडौं नोक्सानी भएको छ ।

४ वर्षसम्म बिद्युत उत्पादन नहुंदा १ करोड ४० लाख १६ हजार यूनिट बिजुली खेर गएको छ । उक्त बिजुलीको प्रतियूनिट ८ दशमलव ५ रुपैयाले हिसाव गर्दा ११ करोड ९१ लख ३६ हजार राज्यकोषलाई सिधै नोक्सानी भएको छ । यत्रो रकम राज्यकोषलाई नोक्सानी हुनु र जनताले बिद्युत सेवा नपाउनुका पछाडी नेपाल बिद्युत प्राधिकरणको गम्भिर लापरवाहि भएको स्थानीय मोती कामीले बताए । कार्यालयमा बस्ने अफिसर देखी फिल्डमा भएका कर्मचारीको समेत आयोजना सञ्चालनमा चरम लापरवाहि गरेका कारण यस्तो भएको उनको भनाई छ ।

तस्विर: होम साउद

बिद्युत नियमित गर्न प्रशासनको निर्देशन

यहि असोज २ गतेवाट बिद्युत पुनः सञ्चालनमा आएपछी हालै प्रजिअ किशोर कुमार चौधरी सहितको टोलिले स्थलगत अनुगमन गरि बिद्युत नियमित सञ्चालनका लागि नेपाल बिद्युत प्राधिकरण अछाम बितरण केन्द्रलाई निर्देशन दिएको छ । ४ वर्षसम्म बिद्युत सेवा अवरुद्ध हुदा कार्यालय भवन समेत जिर्ण हुने अवस्थामा छ । नहर मात्रै भत्किएर बिद्युत अवरुद्ध हुदा समयमै मर्मतसम्भारको अभावमा मुख्य मेसिनमा समेत खराबी आएको थियो ।

बिद्युत नियमित गर्न नेपाल बिद्युत प्राधिकरण अछाम बितरण केन्द्रका प्रमुख रोशन कुमार ठाकुरलाई निर्देशन दिदै प्रजिअ चौधरीले भने ‘नागरिकलाई उज्यालो दिने तपाईको कर्तब्य हो, यो वा त्यो बहानामा अव बिद्युत सेवा बन्द गर्न पाईदैन ।’

स्थलगत अनुगमनमै गएका मंगलसेन नगरपालिकाका प्रमुख पदम बोहराले राष्ट्रिय प्रशारण लाईन जोडिएको भएपनी अछाम जिल्लामा लोडसेडिङले गर्दा बिद्युत प्रयोगकर्ता आजित भईसकेको भन्दै अव कैलासखोला जलबिद्युत केन्द्रले स्थानीयका आवस्यकता पूर्ति गर्नुपर्ने बताए । उनले नगरपालिकाको तर्फवाट पावर हाउस सम्म जाने सडक निर्माणका लागि नगरपालिकाले पहल गरिदिने बताए । जिल्ला प्रहरी कार्यालय अछामका प्रमुख डिएसपी दधिराम न्यौपानेले बिद्युत नियमित सञ्चालनका क्रममा आईपर्ने समस्याका लागि आफुहरु पनी सहयोग गर्न तत्पर रहेको बताए ।

कैलासको बिद्युत अव थप ब्यावस्थित गरेर लैजाँने र आवस्यक मर्मत सम्भार तथा ब्यावस्थापनका लागि आफुहरु कटिबद्ध रहेको बितरण केन्द्र प्रमुख ठाकुरले प्रतिबद्धता जनाएका छन । ३३ केभीए केन्द्रिय प्रशारण लाईन जोडिएको भएतापनी प्रसारण लाईन लामो हुदा बेला बेलामा आईपर्ने समस्याले गर्दा अछाममा उपभोक्ताले घण्टौं लोडसेडिङ खेप्नुपरिरहेको अवस्थामा अव कैलासखोला जलबिबद्युतले राहत मिल्ने बिद्युत प्राधिकरण अछाम बितरण केन्द्रको भनाई छ ।

नियमित रुपमा ४०० किलोवाट बिद्युत उत्पादन गर्न सकिएको खण्डमा अछामलाई लोडसेडिङ मुक्त बनाउनका लागि समस्या नहुने बितरण केन्द्र प्रमुख ठाकुरले बताए । यस अगिका कमि कमजोरी सच्यायर ब्यावस्थापन र आवस्यक मर्मत सम्भारका लागि आफ्नो कार्यालय सक्षम रहेको उनको भनाई छ ।

फोटो क्याप्सन ः अछामका प्रमुख जिल्ला अधिकारी किशोर कुमार चौधरी, मंगलसेन नगर प्रमुख पदम बोहरा सहित सरोकारवालाको टोलि कैलासखोला जलबिद्युत केन्द्रको स्थलगत निरिक्षणमा र आवस्यक निर्देशन दिदै प्रजिअ चौधरी ।

 

कमेन्ट गर्नुहोस्

error: Content is protected !!