अव्यवस्थित तार हटाउने अभियानमा मन्त्री बस्नेत

काठमाडौं, भदौ १८ । सडकका खम्बाहरुमा टाँगिएका अव्यवस्थित केबल र टेलिफोनका तारलाई व्यवस्थित गर्न नेपाल दूरसञ्चार प्राधिकरणले तार काट्न थालेको छ ।

सुरुवाती स्वरुप सञ्चारमन्त्री मोहनबहादुर बस्नेतले माइतीघरस्थित खम्बामा टाँगिएका अव्यवस्थित तार काटेका छन् ।

सोही क्रममा मन्त्री बस्नेतले तारहरुलाई अब जमिनमुनि विच्छाउने तयारी भइरहेको र त्यसका लागि एशियन डेभलभमेन्ट बैंकले सहयोग गर्ने बताए । त्यस्तै उनले सडक फराकिलो बनाउनेबारे पनि छलफल भइरहेको बताएका छन् ।

यसअघि सञ्चार मन्त्रालयले सम्बन्धित निकायलाई बोलाएर तार पहिचान गर्न र व्यवस्थित गर्न भनेपनि व्यवस्थित भएको थिएन । वैधानिकताको दायराभित्र नआएसम्म तार काट्ने अभियानलाई देशैभरि सञ्चालन गर्ने मन्त्री बस्नेतको भनाइ छ ।

नेपाल दूरसञ्चार प्राधिकरणका अध्यक्ष दिगम्बर झाले तार एकै ठाउँमा गन्जागोल हुँदा धेरै ठाउँमा असुरक्षा हुने, बाटोमा मोटरसाइकल तथा गाडी हिँड्दा बेरिएर दुर्घटना हुने भएकाले पनि केबल र टेलिफोनका तार हटाउनुपरेको बताए ।

कमेन्ट गर्नुहोस्

error: Content is protected !!